Um Míuboxið

Míuboxið er falleg hugmynd sem ég hef haft í maganum í mörg ár. Nú loks er hún orðin að veruleika og er ég á fullu að vinna að því hvernig mig langar til að gera þetta. Útlit Míuboxins var hannað af mér í samstarfi við Töru Tjörva. Hér er komin síða sem heldur utan um verkefnið og mun þessi síða hægt og rólega þróast með verkefninu.

Við erum bæði með Míubox fyrir börn 0-18 ára en einnig erum við með Míubox fyrir foreldra. Eins og það er yndislegt að gleðja gormana okkar þá eiga foreldrar langveikra barna það til að gleymast ansi oft í öllu þessu ferli sem það er að eiga langveik börn. Á langtíma óskalista Mia Magic er að gera systkina Míubox.

Öll Míuboxin eru hönnuð út frá þeim einstakling sem fær það afhent og því er hvert og eitt Míubox afar sérstakt rétt eins og sá einstaklingur sem fær það afhent. Við erum með það að markmiði að ná að koma út einu foreldraboxi og einu barnaboxi í mánuði til að byrja með á meðan við erum að koma þessu í gang. Allar auka úthlutanir verða algjör bónus. Þetta verkefni er unnið við borðstofuborðið heima og því er allt sem viðkemur Míuboxinu sjálfboðavinna. Einnig vil ég koma því á framfæri að allt sem fer ofan í Míuboxin eru gjafir frá fyrirtækjum sem ég er óendanlega stolt af að fá að vinna með.


Míubox nr 1 fór út föstudaginn 16. október 2020. Gleðin var mikil hja Söru Natalíu sem fékk fyrsta Míuboxið. Heildverslunin Ásbjörn Ólafsson var fyrsta fyrirtækið til að koma inn í verkefnið og hafa þau staðið þétt við bakið á Mia Magic og er ég þeim óendanlega þakklát á allan hátt. . Míu bókin sem ég skrifaði sem ber nafnið Mía fær lyfjabrunn fær svo að sjálfsögðu að fljóta með í öll box. Þar sem ekkert box er eins er mikilvægt að hafa gott fólk og fyrirtæki með sér í þessu. Við leitum alltaf eftir flottu fólki og flottum fyritækjum til þess að leggja okkur lið. Erum opin fyrir öllum hugmyndum.